اختبارات التربة

#سؤال_فني. ... #مهندس_طرق

لو سمحت يا بشمهندس دي طبقة أساس بعد ما فردت ودمكت ظهرت معايا المشكلة الظاهرة في الصورة ياتري إيه أسبابها؟ وحلها إيه؟ واتجنب حدوثها ازاي فيما بعد؟ وتأثيرها ايه عالطريق حاليا؟

.........

بدايةً السؤال ممتاز وفني جدا لإني أعدت صياغته 👌

#السبب في المشكلة اللي أمامنا هو فرد طبقة الأساس باستخدام الجريدر لا الفرادة »»»» إذا الشغل ده في مصر 🤗 لإن تقريبا في جميع دول الخليج بيتم تشغيل طبقة الاساس باستخدام الفرادة وهو الأصح حفاظا علي مناسيب التأسيس ووصولا لسطح أسفلت مستوي وخالي من الوعورة (مطبات الهواء) لإن بدايةً من طبقة الأساس بيتم إستلام المناسيب بدقة متناهية حتي تكون دليل أثناء فرد طبقات الأسفلت

نستنتج مما سبق إن الجريدر ما خلطش كويس وبالتالي كان فيه انفصال حُبيبي أدي الي تجمع المواد الخشنة في جانب والناعمة في جانب آخر وبالتالي ..

#حلها هو حرث هذه المنطقة وحرث بعض الأحزاء المجاورة لها ، وبعد الحرث يتم تقييم نسبة الرطوبة ولو اتضح انها محتاجة مياة زيادة هنرشها عليها ونخلطها كويس جدا الي ان يختفي هذا الانفصال ثم تسطح طبقا للمنسوب ويعاد دمكها.

ممكن في حل بيعمله المهندس #فرقع_لوز إنه بيجيب مواد ناعمة يفردها فوقها ويغرقها مياة ويسيبها ساعتين مثلا ويعيد دمكها او انه بيغرقها مياة ويدخل عليها الهراس بالهزاز فيبدء يخرج الناعم من تحت لفوق ويبقي عامل زي الطينة او تقدر تقول الطحينة وبالتالي يقفل المسام ظاهريا ويعطي مظهر خادع للطبقة ودي بنسميها (تزبيد الطبقة) لو شفت حد بيعملها سيحه في معلقة زبدة واعمل منه #بيض_اومليت 👊

#تتجنبها فيما بعد عن طريق

١- الخلط بالخلاطة المركزية او التخليط في التشوينات ان لم يتاح لك الخلاطة

٢- يتم فرد الطبقة باستخدام الفرادة ومن يظن ان الفرادة أبطأ فهو علي خطأ مبين ، لو مافيش فرادة ولا خلاطة يبقي خلط في التشوينات وافرد بالجريدر وهتبقي وظيفة الجريدر هنا هي ضبط المناسيب والفرد فقط ... لو مش هتخلط برا يبقي خلط بالجريدر علي القطاع وبشكل صحيح وزود عدد مرات التقليب.

٣- هات لك سواق جريدر محترف وسلمه جريدر كفاء عالية واستلم منه انتاجية وفرق التكلفة هتعوضه معدل انجاز.

#تأثيرها إيه عالطريق؟؟ ... غالبا مش هتحقق نسبة الدمك المطلوبة بسبب التعشيش وعدم وجود مواد مالئة للفراغات وبالتالي هيصعب إيصالها للمنسوب المطلوب (غالبا هيكون منسوبها اعلي).

لو منسوبها اعلي مش هتقدر تنزله باستخدام الجريدر لان المواد خشنة وهيصعب كشطها لان السطح هيتقلقل ويخرب

كمان ادائها اثناء تشغيل الطريق وفتحه للمرور غالبا هتسبب مشاكل هبوط وتشريخ في الاسفلت .

#السيد_داود ... #هندسة_المواد مسألة حياة او موت 💪

#اعرف_الصح واعمل بيه