اختبارات التربة

#سؤال_فني

بعد فرد طبقة الاسفلت ودكها بالهراسات ظهر اللون الابيض ده ايه سببه وكيفية معالجته؟؟

........................

#الإجابة

الشكل الظاهر أمامنا له عدة أسباب هذكرها بالترتيب بحيث السبب الأقوي والأرجح هيكون في الأول:

١- ضعف في المواد المستخدمة (الركام) وده ممكن نلاقيه في بعض حبات الركام دون غيرها وفي الحالة دي يبقي المشكلة في المصدر يعني ممكن يكون في عرق صخر في المصدر المستخدم في الكسارة ظهر فجأة وبالتالي تسبب ان المواد كانت قوية وادائها جيد وفجأة ظهرت المشكلة دي .. ونتأكد من الموضوع بعمل اختبار مقاومة البري لو فشل الاختبار يبقي مافيش سبب آخر

لو نجح الاختبار ممكن نعمل حاجة جميلة نتاكد بها من وجود العرق الضعيف ده من عدمه وهي إننا نعمل اختبار مقاومة البري (لوس انحلوس) وبعد ١٠٠ دورة فقط نشوف كمية الفاقد ونرجع نكمل الاختبار لغاية ٥٠٠ لفة ونقارن النتايج لو عند ١٠٠ كانت كبيرة مقارنة ب ٥٠٠ لفة يبقي تأكدنا من وجود العرق الضعيف اللي عامل المشكلة.... والا يبقي هنروح لسبب آخر

٢- إن المواد بها طبقات جيرية مغلفة للحبيبات ولم يتم تجفيفها جيدا في المحماص للتخلص من هذه المواد الناعمة وبالتالي لم يحدث تغليف جيد للحبيبات، وبالتالي مع دخول الهراسات الحديد بتبدء المواد الناعمة تفك ويظهر الشكل ده وتزداد المشكلة مع

٣- قصر زمن الخلط وعدم التغليف الجيد للحبيبات وكذلك

٤- نقص نسبة البيتومين عن النسبة الـ Optimum وبالتالي عدم التغليف ايضا بشكل جيد ، وهنا فايدة التغليف انه بيسهل حركة الحبيبات بالنسبة لبعضها لبعض وبالتالي سهولة انضغاط طبقة الاسفلت واخراج طبقة اسفلت كثيفة تحقق نسبة الدمك المطلوبة ونسبة الفراغات الهوائية والعكس صحيح ، قلة البيتومين وعدم التغليف بغض النظر عن اسبابه يصعب عملية الدمك ويزيد من احتكاك الحبيبات ببعضها وبالتالي صعوبة الانضغاط وعدم قابليتها للدمك مما يزيد من تركيز حمل الهراس علي الحبيبات الناتئة او البارزة لاعلي فيؤدي الي تهشمها.

٥- دخول الهراسات الحديد علي الطبقة عند درجات حرارة منخفضة وبالتالي تيبس المادة الرابطة (البيتومين) وتحول الطبقة الي مادة شبة صلبة صعبة الحركة وبالتالي تهشم الحبيبات تحت تأثير وزن الهراس .. علشان كدا الهراسات الحديد بتدخل بعد فرد الاسفلت مباشرة وبعد الوصول لدرجة حرارة الدمك ، بعدها يتم إدخال الهراسات الكاوتش

أيا كان السبب فلابد من التقصي واستبعادها جميعا واحد تلو الاخر حتي الوصول للسبب الفعلي واتخاذ الاجراء التصحيحي اللازم بتغيير المصدر او زيادة زمن الخلط او ضبط نسبة البيتومين او زيادة وقت التجفيف في المحماص والدمك عند الوصول الي درجة حرارة الدمك

#عفاريت_الاسفلت 🤔

ها مين يزود ؟🤨🧐